Eze 14 | ZomZIV | STEP | Israel upate pawlkhat ka kiangah hong pai-in ka mai-ah tu uh hi.

Ezekiel 14

Milim Biate Kimawhpaih

1 Israel upate pawlkhat ka kiangah hong pai-in ka mai-ah tu uh hi. 2 Tua ciangin TOPA thu kei tungah hong tunga: 3 “Mihing tapa aw, hih mite in a lungsimun milim bia uh a, amaute maitangah kimuktuk nading gitlohna a koih uh hi. Amaute thu kidongsak peuhmah ding ka hi hiam? 4 Tua ahi ciangin hopih inla amaute tungah gen in, ‘Hih in Thupipen TOPA gen ahi hi: Israel-te khat peuhpeuh in a lungsim ah milim bia a, amaute mai-ah kimuktuk theihna gitlohna koihin tuaci-in kamsangpa kiangah a pai uh leh a milim biak uh a liatna tawh kizui-in keimah TOPA in ka dawng ding hi. 5 Keimah in a milimte uh hanga keimah hong puakoih Israel mite lungsim zawh kik nadingin ka hih ding hi,’ ci in. ^a

6 “Tua ahi ciangin Israel innkuante tungah gen in, ‘Hih in Thupipen TOPA gen ahi hi: Kisik un! Na milimte panun kihei unla a kihhuai na gamtatnasa teng uh lehngatsan un!

7 “Israel-te ahikeh Israel-te laka a teng pemta khatpeuh kei tawh a kikhenkhiat nop-a a lungsimah milimte bia in, amai ah kimuktuk theihna gitlohna koihin tua ciangin kei thu dong dingin kamsangpa kiangah a pai leh TOPA kei mahmah in ka dawng ding hi. 8 Tua mipa ka lang-et dinga mi tehkakna le mi thugentehna ka suaksak ding hi. Ka mite panin ka khenkhia ding hi. Tua ciangin TOPA ka hilam na thei ding uh hi.

9 “‘Kamsang khat kamsang dingin a kizol-a a kithuzawh leh keimah TOPA in tua kamsangpa ka thuzawh dinga ama langkhatah ka khut zanin ka mi Israel-te lakah ka susia ding hi. 10 Amaute khialhna amau mah in thuak ding uh a - a kamsangpa a thu dongpa zah mahin a mawh ding hi. 11 Tua ciangin kei kiang pan Israel mite gammang nawn lo ding uh a, amaute mawhna khempeuh hangin a kininsak nawn kei ding uh hi. Amaute keima mi hi ding uh a, keimah amaute Pasian ka hi ding hi, Thupipen TOPA in cikhia hi,’ ci-in gen in,” hong ci hi. ^b

Thukhenna Pan Kisuakta Theilo

12 TOPA thu kei tungah hong tunga: 13 “Mihing tapa aw, gam khat in muanhuai loin kei langah mawhna a bawl leh a langkhatah ka khut zanin a an ngahna ka khaktansak dinga, kialpi tungsakin a mihing a ganhingin ka that dinga 14 hih mithumte - Noah, Daniel ^{▼▼14.14 Ahikeh Daniel; Hebrew ah kamsangpa Daniel lo midang khat ci nuam hi leh kilawm hi; tg. 20 ah zong} le Job - tua sungah a om zongin amaute’ thumaanna in amaute bek a honkhia zo ding hi. Thupipen TOPA in cikhia hi. ^d

15 “Ahi kei leh tua gam, gamsate hangin kuamah in a tot theih loh nadingin gamsa gilo sawl leng ta nei loin nusia ding uh a, gamkhing a suak ding hi; 16 kei mah Thupipen TOPA ka nuntakna ka kilo hi, hih mi thumte tua gam sungah a om uh zongin amaute in a tanu a tapate uh a honkhia zo kei ding uh hi. Amaute bek suakta ding uh a, ahi hangin leitang gamkhing a suak ding hi. ^e

17 “Ahi kei leh tua gamah namsau sawlin, ‘Gamsung khempeuh namsau vatsuaksak un,’ ci-in a sunga mite le ganhing teng thatsak leng, 18 Thupipen TOPA in ka nuntakna ka lo hi, hih mi thumte a sungah a om uh zongin a tanu a tapate uh a honkhia zo kei ding uh hi. Amaute bek a kisuaktasak ding hi.

19 “Ahi kei leh tua gam sungah pulpi tungsakin ka thangpaihna sisan luanna-in zangin khua sungah mihing ganhing thatsak leng 20 Thupipen TOPA in ka min ka lo hi, tua sungah Noah, Daniel le Job-te a om uh zongin a tanu a tapate uh a honkhia zo kei ding uh hi. A thumaanna uh hangin amau le amau bek kihonkhia zo ding uh hi. ^f

21 “Ahang in, Thupipen TOPA thugen hih ahi hi: Jerusalem ah a sunga mihing ganhing a that dingin a lauhuai ka thukhenna nam li - namsau, kialpi, gamsa gilo le pulpi-te ka tunsak ciangin siahuai si incia! 22 Ahi zongin tua pua-a kipuakhia ding tanu tapa a omlai a om ding hi. Amaute nang kiangah hong pai ding uh hi. Amaute gamtat luhekzia na muh ciangin tua khuapi tunga ka tunsak gimnate khempeuh - Jerusalem ah tungsak ding mah hi, ci-in na lungsim a zangzaw ding hi. 23 Amaute gamtat luhek na muh ciangin a thu om lopi in a mawk hih ka hi lo lam thei-in na lungsim a nuamtuam ding hi, Thupipen TOPA in cikhia hi,” hong ci hi.